قىتايدىڭ ۋلانچابە قالاسىنان قۋانىشتى حابار كەلدى. وسىندا 13 تامىزدا مارەگە جەتكەن بوكستان ايەلدەر اراسىنداعى ازيا چەمپيوناتىندا قازاقستاندىق داريعا شاكىموۆا 75 كيلوعا دەيىنگى سالماقتا قۇرلىق چەمپيونى اتاندى.
فينالدىق شايقاستا الاڭ يەسى – قىتاي سپورتشىسى لي كيۋانمەن قولعاپ تۇيىستىرگەن داريعا 3:0 ەسەبىمەن جەڭىسكە جەتتى. ءسويتىپ, ازيانىڭ ەكى دۇركىن چەمپيونى دەگەن اتاققا قول جەتكىزدى. ول ءبىرىنشى رەت 2010 جىلى الماتىدا وتكەن قۇرلىق بىرىنشىلىگىندە 69 كيلوعا دەيىنگى سالماقتا التىننان القا تاققان ەدى. داريعا – پەتروپاۆل بوكسىنىڭ تۇلەگى. 1988 جىلعى 20 قاراشادا تۋعان. قازاقستاننىڭ 2012 (75 كگ سالماقتا), 2013, 2014, 2015 (ۇشەۋىندە دە – 69 كگ) جىلدارعى چەمپيونى.
ونى ۇلكەن بوكسقا الىپ كەلگەن جەكە جاتتىقتىرۋشىسى سەرىك بەكتۇرعانوۆ بولسا, قۇرامادا باس باپكەر ۆاديم پريسياجنيۋكتىڭ باقىلاۋىندا جاتتىعادى. ازيا بىرىنشىلىگىندە قازاقستاندىق ساپىنان تاعى ءۇش بوكسشى قولا جۇلدە الدى. وعان گاۋھار ەرمەكباي (69 كگ), ءمولدىر بازارباەۆا (81 كگ) جانە ءلاززات كۇنگەيباەۆا (+81 كگ) سىندى اتلەتتەر قول جەتكىزدى. چەمپيوناتتا 6 التىن, 1 كۇمىس جانە 1 قولا مەدالعا قول جەتكىزگەن قىتاي قۇراماسىنا تەڭ كەلەر ەشكىم بولمادى. ەكىنشى ورىنعا 2 التىن مەدالى بار تايلاند قىزدارى ورنالاستى. ال 1 التىن, 3 قولا مەدالدى قازاقستان جاساعى ءۇشىنشى ساتىعا كوتەرىلدى.
دامير قوجامقۇل.